श्रीगीतास्तोत्र

श्रीगीतास्तोत्र

गीतेचे ध्यान मी नित्य करावे चित्त लावुनी

अंतरी कृष्ण पाहावा ऐकावे हात जोडुनी।१

सद्गुरु कृष्ण वाटू दे जिज्ञासू पार्थ मी स्वतः 

रंगावे सुख संवादी बाणावे ऐक्य तत्वतः।२

मोहना मोह ना राहो कोण मी मजला कळो

देहबुद्धि त्वरे जावो सोsहं तो मी कळो,वळो।३

ओघाने कर्म आलेले आज्ञा ती तव वाटु दे

मी न कर्ता, तूच कर्ता भाव हा हृदी वाढु दे।४

सत्यार्थ झुंज झुंजावी वृत्ति निर्भय दे मला

ढळो ना चित्तशांती ही योगेशा प्रार्थितो तुला।५

ज्ञानाग्नि पेटता राहो पापे त्या पुढती किती

कर्म साधन सुंदरसे ज्ञानलाभार्थ संप्रती।६

विश्वरूपा अणुरूपा अनंता अच्युता तुला

वंदना नम्र मी केली तुझ्या तू सावरी मुला।७

आत्मविश्वास वाढावा समता लेश ना ढळो

अष्टश्लोकात जे आले श्रीरामाला कळो वळो।८

।।श्रीकृष्णार्पणमस्तु।।

रचयिता : श्रीराम बाळकृष्ण आठवले